Einu sinni voru leikir ekki flóknari en það að hægt var að stjórna þeim með einföldum stýripinna. Það var lítið um mögulegar skipanir sem oftast voru ekki flóknari en „hreyfa kall upp, hreyfa kall niður“. Með tímanum hinsvegar bættust við auknir möguleikar til stjórnunar með tilkomu lyklaborðs, músar, flóknari stýripinnum og sérhæfðum leikjastýripinnum líkt og þeim sem við notum í dag. En það er ekki nægilegt, finnst sumum, að stjórna leikjum með því að ýta á takka eða hreyfa pinna eða mús. Við höfum þegar séð núverandi leikjatölvur prófa nýja hluti, þá sérstaklega með hreyfiskynjum líkt og í Nintendo Wii og nýlega X360 Kinetics og Playstation Motion. Þá er farið að skipta máli hvernig notandinn hreyfir meira en bara puttana. En leitin að nýjum stjórnmöguleikum stoppar ekki þar enda má sjá dæmi um notkun hljóðnema sem gera notanda kleift að nota rödd sína til aðstoðar.
Það er þess vegna sem að enn einn möguleikinn vekur áhuga minn. Í gegnum árin og þá oftast í vísindaskáldskap hefur oft verið ýjað að stjórnun tækja með huganum þar sem maður og vél eru farin að sameinast, hugur mannsins sökkvandi inn í vélina þar sem að stjórn hans yfir maskínunni er fullkomin. Núverandi tækni gerir okkur kleift að gera eitthvað í líkingu við þetta og þess vegna er það frekar spennandi að vita að hér á Íslandi í skrifstofum staðsettar á Lækjargötu er íslenskt fyrirtæki í frumkvöðlastarfsemi við að búa til forrit sem nýta þessa tækni. Þetta eru hinir réttnefndu Mindgames sem að ég fékk að heimsækja nú um daginn.
Deepa Iyengar, forstjóri, tók á móti mér og við eyddum talverðum tíma í að ræða um þróun þessarar tækni auk starfsemi Mindgames. Tæknin bakvið þetta er einföld í útskýringum þó svo að það sem bakvið liggur sé mun flóknara. Í hnotskurn er þetta svona; heilinn í okkur sendir frá sér ákveðnar bylgjur sem ákvarðast af hugarástandi. Með sérstökum búnaði er hægt að einangra mismunandi tegundir af hugarástandi og nýta það sem innslátt í hugbúnaði hvort sem um er að ræða leiki eða forrit. Neurosky er einn slíkur framleiðandi og hafa þeir búið til nema sem að þeir selja svo til hönnuða í von um að með frekari samvinnu megi þróa þessa tækni til að verða fullkomnari, það er að segja með bættri lesgátu ef svo má orða það. Mindgames er einn slíkur hönnuður og hefur þegar nýtt sér tæknina til að hanna leik að nafni Tug of Mind.
Um er að ræða um einskonar reipitog sem ræðst af hæfileika notandans til að einbeita sér á meðan grettandi andlit þeysir í mann óyrðum. Hægt er að taka mynd af vinum og leyfa leiknum að setja andlitið á þrívíddarmódel auk þess að biðja viðkomandi aðila um að segja eitthvað pirrandi eða truflandi til þess að gera leikinn erfiðari. Ég fékk að prufa leikinn, sem er í vinnslu fyrir Iphone, og hafði ákaflega gaman af. Mér gekk þó ekki sérlega vel í fyrstu tilraun, heitur dagur og nýtt fólk valdandi mér smá ugg sem að leiddi til langrar afslöppunarbaráttu við „fésið“ í símanum. Seinni lota mín var gegn mynd af móður Deepu á erfiðari stillingu en þegar ég var kominn á lagið með þetta og gat sett mig á einbeittan og rólegan hugarstað leið ekki á löngu áður en andlitið byrjaði að brosa og ég hafði unnið leikinn. Leikur sem ræðst af hæfileika til að halda ró sinni og einbeytingu. Furðulegt en satt.
Neurosky eru þó ekki einir um þessa tækni. Nefna má keppinauta eins og Emotiv sem hafa samskonar tækni en þó verð ég að játa að nemi þeirra lýtur ekki sérlega vel út og einhvernveginn finnst mér eins og hann sé einungis hannaður fyrir sköllótta.
Þegar ég spurði út í þær hættur sem fylgja þessum iðnaði útskýrði Deepa að það væri mjög erfitt að skila svona afurð til markaðsins á réttan hátt. Fyrir það fyrsta þá virka heilar okkar ekki alltaf nákvæmlega eins. Fólk nálgast afslöppun á mismunandi hátt og því gæti farið að notandi myndi taka upp höfuðtólið, prófa leik og ganga illa og þar með áætla að annaðhvort virki þetta ekki eða þá að eitthvað sé að heila hans. Þó sé hugmyndin hjá Mindgames að bjóða upp á einskonar aðlögun inni í leiknum þar sem að notandinn er beðinn um að prófa ýmsar slökunaraðferðir og getur fylgst með árangri sínum um leið.
Annar hættupunktur er sá að þar sem um er að ræða frumkvöðlastarfsemi eru vægast sagt ekki margir sem eiga og nota tilgreindan heilabylgjunema. Það gæti orðið erfitt að sannfæra hinn almenna notanda um hversu „svalt“ það er að nota svona tæki. Þó ef við hugsum til fortíðar var sá tími sem að notendur bluetooth stykkja fussuðu og sveiuðu yfir hversu hallærislegur þessi aukabúnaður var.
Tug of Mind er enn í vinnslu en þó mætti búast við honum bráðlega en samkvæmt Deepu veltur það allt á hversu vel gengur hjá Neurosky að koma með búnað sem er I-phone nothæfur. En Tug of Mind er ekki eina heilafóstur Mindgames. Eins og flestir framtakssamir eru þeir með nokkrar hugmyndir til viðbótar í vinnslu, þó á grunnstigi. Leikurinn Gods & Mortals á að byggja á sömu tækni en öðruvísi spilun. Skv Deepu hefur hún alltaf heillast að fjölspilunarleikjum þar sem að fólk þarf að vinna saman á einhvern máta og hugmyndin er að gera það að megin áherslu í leiknum. Um er að ræða leik þar sem fólk bæði með heilabylgjunema og án hans getur spilað. Heilabylgjunemaeigendur myndu taka á sig hlutverk guða, sem svífa um á himnum og reyna að spilla fyrir mannverunum (þeim sem eiga ekki heilabylgjunema) þar sem þeir hjálpast að og reyna að klifra upp skjáinn til guðanna, til þess að steypa þeim niður.
Einn merkilegasti partur heimsóknar minnar held ég að hafi verið framtíðarsýn Mindgames. Hugmynd þeirra um hvernig þessi tækni megi notast við kennslu, þá sérstaklega á grunnskólastigi er hreint sagt stórkostleg. Í stuttum myndbút fékk ég að sjá hvernig slíkur leikur myndi virka og ég varð vægast sagt öfundsjúkur út í framtíðarkynslóðir, sem gætu ef til vill fengið að njóta hálfgerðrar Jedi-þjálfunar… mínus sverðin. Á tíu mínútna spilunartíma myndu börnin þurfa að ná einbeytingu upp að vissu marki í sameiningu til þess að setja af stað atburðarrásir innan eins og miklahvell sem að síðan myndi leiða til frekari möguleika eins og að þróa plánetur, deila árangri sínum auk þess að fstigatöflur og einspilun.
Ef þessi tækni og markaðssetning heppnast, þá erum við að ræða um stórkostlegt tækifæri til leikjahönnunar hér á klakanum; fæðingarstaðs lítilla hugameistara.
En til þess að framtíðin beri árangur má búast við að Mindgames þurfi auka starfskraft. Þegar aðspurð sagði Deepa að fólkið sem þau kæmu þá líklegast til með að þurfa væru þau sem hefðu á sér sterka nýsköðunarhlið. Fyrirtækið er allt um hugmyndir og hvernig má nota þær. Þess vegna skiptir miklu máli að fólkið geti unnið á fleiri en einu sviði til að koma sem mestu frá sér. Nýlega voru Mindgames að senda frá sér yfirlýsingu um hvernig starfskraft þau vantar á www.igi.is. Endilega skoðið færsluna ef þið hafið þekkinguna og viljann til að leggja þitt af mörkunum hjá Mindgames.
Nú fyrir stundu var CCP veitt Útflutningsverðlaun forseta Íslands afhent við hátíðlega athöfn og tók Hilmar Veigar Pétursson, forstjóri fyrirtækisins, við þeim. Samkvæmt 
